U kaláanta'al jump'éel t'aane', je'el u béeytale', wa u nupmaj u muuk' kaaj, u ba'alile' le múulmeyaj wa nuup pmuuk'o', u ya'abil u téenale' ku péech'óolta'al tu yóo'lal ba'ax ku taasik tu paach le tuukul ku jest'ik bix unaj u yúuchul tuukul, wa beey xan ku taasik discriminación yéetel racismo.
Jump'éel t'aane', ma' chéen ti'al k a'alik wa ba'axi', beey xan, jump'éel ba'ax e'esik máaxo'on, k miatsil yéetel u k'ajla'ayil jump'éel kaaj, leti' beetike' u kaláanta'al jump'éel t'aane', leti' u kaláanta'al xan u déerechojil u yila'al máako, u táakpajal ti'al u jóok'sa'al táanil kaaj/kajnáalo'ob, u taak'ino'ob yéetel u miatsilo'ob, táanili' u na'atpajale' táaka'ano'on ichil junmúuch' jejeláas wíiniko'ob.
Ti'al k k'exik le tuukul ma' tu cha'ik u yila'al wa ku mixba'alkúunsik u máaxilo'ob le kajnáalo'obo', le grupos locales wa le múuch'kajnáalo'ob kun meyaj cihil u kaajalo'obo', yaan u kaxantik u síijsiko'ob kúuchilo'ob/súutukilo'ob tu'ux ku béeytal u tsikbalta'al wa u múul tukulta'al le k'aas tuukul yaan walkila', ti'al túune' u patojo'olta'al u jeel tuukul ti'al u mu'uk'ankúuns'aal kaaj/kajnáalo'ob, ba'ale' tu'ux ka ts'aatáanta'ak ba'ax u yojelo'ob, wa beka'aj kaambalil ichil u kaajal/kajnáalilo'ob. jump'éel kaaj u k'áat u mu'uk'ankúunsikubáaj bey kaaje', leti' le kaaj je'el u k'uchul u kaláant u t'aan yéetel u miatsile'.
Tu yóo'lal le ba'ax k a'alika', beetchaj múuch'táambalo'ob, tsikbal yéetel múuch'kabil wa organizaciones, colectivos táan u beetiko'ob jejeláas meyajo'ob(meyaj ich solar, u ti'alinta'al lu'um, u tséentikubáaj máak, u kaambal mejen paalal, ichil uláak'o'ob) ti'al u táakbesa'al u k'a'ananil le kúuchilo'ob/súutukilo'ob ti'al u tsikbalta'al yéetel u múul tukulta'al le narrativa colonial wa u tuukul sakwíinik, ku k'atikubáaj ichil tuláakal meyajo'ob wa proyectos, kex túun jejeláase', ba'ale' ku ts'aatáantik u déerecho maaya kaaj ti'al u jáalk'ab kuxtalo'ob yéetel u ya'alik máaxo'obi'.
Le u jaatsil nup meyaj wa múul meyaja', ku k'aaba'tik Red Péekbal. te k'iino'oba', le redo' ts'o'ok u ch'úuyul u yáax icho'ob, leti' le je'elo'oba':
Múul tuukul: Le je'ela' beetchaj yéetel tsikbalo'ob, tu'ux múul patojo'olta'ab u kuxtal maya t'aan ti'al tu paachil k'iin, beey xane', xak'altpaj bix je'el u yajsa'al yéetel u péeksa'al u yóol kaaje', le je'ela' béeychaj ikil u'uypaj u tuukul, ba'ax ku ts'íiboltik, ba'ax k'a'abéet ti'ob, bix u na'atiko'ob jejeláas ba'alo'ob le máaxo'ob táakbesik le redo', máaxo'ob u ya'abil u téenele', u t'aano'ob wa u tuukulo'ob ma' chéen uti'alo'obi' ikil ti' yano'ob ichil múul meyajo'obe'.
Múul Kaambal: Múul kaambal: kaambalilo'ob ku síijil ichil le máaxo'ob táakbesik le Redo', le je'ela' tsolpaj ti' jump'éel katálogo, beey xane', jump'éel tsoolil ti' ba'ax ku beetik wa u joyel láalaj juntúul máak táakbesik le reedo', beyo' ka síijik le múulmeyaj yéetel múulkaambalil ichilo'obo', tu'uxe', leti'ob ka u organisarkuba'ob ti'al u kanik/kaansiko'ob wa ba'ax ti' uláak'o'ob, wa beey xan ka u tsikbalt ba'ax ku beetiko'ob ti'al u mu'uk'nakúunsik u meyajo'ob yeéetel le ba'ax u yojelo'obo'. Le je'ela' u k'áat u ya'ale', leti'ob ka u ch'a'at'anto'ob, u yáantikuba'ob, u múul kaambalo'ob wa beey xan u yáantikuba'ob ichil le máaxo'ob táakbesik le reedo' (je'el bix, catálogo de perfiles, múuch'táambal virtual ti'al u láak'inta'al grupos locales, u tsikbaltiko'ob u meyajo'ob ti' uláak'o'ob).
Múul Meyaj: Láalaj juntúul máax táakbesik le redo', ku taasik jejeláas tuukul, meyaj, yaan k'iine' oka'ano'ob xan ichil uláak' organizaciones. Le múul xíimbalo', u k'áat u ya'ale', le péekbalo' jump'éel kúuchil tu'uxe', ba'ax e'esik máaxo'one', leti' k a'alik k maayajilo', yéetel sáasil to'on tu'ux k k'áat bin tu yéetel, beey túuno', k ts'aik k tuukul je'el tu'uxak k taale', ti'al k múul kaxantik jump'éel ba'al maanal ti' le chéen k a'alik tu'ux k meyaj, wa ba'ax organizacionil k taal. (je'el bix le meyaj ku beetik le sembradores ti' u ámbitoil Administración pública wa uláak'obo').
Múul Xíimbal: Uláak' junjaats jach nojba'al ichil le reda', ku ye'esik jejeláas tuukul, meyaj, wa beey xane' ku táakbesik uláak' múuch'kabil wa organisasyono'obi'. Le múul xíimbal ichil u Péekbal Waye', ku ye'espajal tu yóo'lal u ya'alikubáaj máak, maaya wíinik, yéetel sáasil ti' to'on tu'ux k k'áat bin, leti' beetik, je'el tu'uxak k meyaj wa oka'ano'one', ba'ale', k táakbesik k tuukul wa k meyaj ti'al k chukpachtik jump'éelili' ba'al k kaxantik, le je'ela', maanal u noj utsil ti' tu'uxilo'on wa tu'ux k meyaj. (Je'el bix le ku taal u beetik le sembradores por ámbitos).
Le chan kóon tsoolil ti' ba'ax meyajil ku beetik le péekbalo', ku ye'esik ba'ax ts'o'ok u bin beetchajal, yéetele', le ba'alo'oba' táan u bin u patik jump'éel contranarrativa, wa tu bin u k'exik le k'aas tuukul yano', le je'ela', ku ye'esike', le túumben tuukul wa narrativao', ma' jump'éel káampanya wa ba'alo'ob ti'al e'esbili'; leti' le tuukul wa u yóol beetik u péek máaxo'ob táakbesik le redo', ba'ale', beey xan ba'ax táan u jóok'ol ti' le múulmeyajo'. ba'ax túun k óotik a'al yéetel le je'ela', le meyaj táan u beetik le redo', táan u bin u je'ik bej ti'al tu paachil k'iin uti'al le t'aano', pa'te'e yéetele' táan u wa'akunsiko'ob u yokmil kun kuchik. (Kúuchilo'ob tu'ux ku beytal k meyaj)