Jump'éel ti' le ba'ax ku kaxantik U Péekbal Waye', leti' u patik u jeel tuukul ka u yil u k'exik le tuukul clasista yéetel racista yaan tak walkil tu yóo'lal le maaya t'aano'. U tia'al u béeytal le je'ela', bin u patjo'olta'al ichil tsikbalo'ob wa foros, tu'ux jach ch'enxikinta'ab u tuukul yéetel bix je'el u beetik le máaxo'ob jach u ts'aamaj u yóolo'ob u meyajto'ob le temas beya', tu'ux xan ka kaxanta'ak chíimpolal yéetel u nojba'alkunta'al maaya t'aan.
Ichil le tuukulo'ob jóok' tak walkila', jach ku chíikpajal le ka beeta'ak bin jump'éel káampanya ti'al u yajsa'al yéetel u péeksa'al u yóol le jejeláas jaatsil kajnáalo'obo', le je'ela' ti'al u yoksa'al tu tuukulo'ob u noj ba'alil u t'a'anal le t'aan te' k'iino'oba'. le káampanyaj, ma' xaane', je'el u táakbesik meyaj ichil najilo'ob xooke', náaysaj óolil, u k'i'itbesa'al informasyon tu'ux ka kaxanta'ak u chíimpolta'al yéetel u kaláanta'al le t'aano'.
Uláak'e', táan u tukultpajal u noj ba'alil u beeta'al mokt'aano'ob wa múulmeyajo'ob yéetel institusyones ti' kaambal, múuch'kabil wa organizaciones ti'al kaaj, wa ku meyaj ichil kaajalo'ob, medios de comunicación ti'al beyo' u náachtal le káampanyajo', beyo' ka u péeks u yóol u ya'abil kajnáalo'ob. Ichil tuláakalo'on, je'el u béeytal k meyaj ti'al k k'exik u tuukulil bix juntúul maaya wíinik, bey xan yóosal maaya t'aan yéetel maaya miatsil, ti'al k k'i'itbesik u k'a'ananil le chíimpolal yéetel u kaláanta'al maya t'aan, wey peten lu'ume'.